30 шықәса раԥхьа, 1994 шықәса абҵарамза 26 рзы иаатит Аԥсны Жәлар Рџьынџьтәылатә еибашьра иазку Гәдоуҭатәи амузеи. Аԥхьанатә иара амузеи-ҳәырԥсарра "Абазгиа" акәын.
Амузеи аԥҵараҿы Аԥсны раԥхьатәи ахада Владислав Арӡынба хаҭала илагала дууп ҳәа лҳәеит амузеи аиҳабы Гәыгәыца Џьыкырԥҳа.
Иахьа Гәдоуҭатәи амузеи азалқәа 8 рыла ишьақәгылоуп. Уа Аџьынџьтәылатә еибашьра, Аԥсны раԥхьатәи ахада, амҳаџьырцәа, арепрессиақәа ирылаӡыз, иара убас аԥсуаа ркультуреи рыбзазареи ирызку аекспозициақәа цәыргақәҵоуп. Уажәы Гәдоуҭатәи амузеи аҵыхәтәантәи, аабатәи азал аартразы аҽазыҟаҵара иаҿуп. Уи аԥсуаа ркультуреи рыбзазареи ирызкуп.