АҞӘА, абҵара 27 — Sputnik. Асезон нҵәаанӡа Аԥснынтәи 37 нызқь тонна рҟынӡа ацитрустә шәырқәа риагара азгәаҭоуп ҳәа иҳәеит Ақыҭанхамҩа аминистр инапынҵақәа назыгӡо Беслан Џьопуа атәыла ахада инапынҵақәа назыгӡо Бадра Гәынба имҩаԥигаз аиԥылараҿы. Абри атәы аанацҳауеит атәыла ахада ипресс-маҵзура.
Иара иажәақәа рыла, сынтәа аҽаҩра бзиоуп. Уи абзоуроуп ацитрустә шәырқәа знапы рылаку анхамҩақәа реизҳареи аҳәынҭқарратә программа инақәыршәаны рыхәшәтәреи.
Џьопуа иазгәеиҭеит, сынтәа афеихоа, ахәырма, апатырқал аҳәаа рахыгаразы аҭагылазаашьа шеиӷьхаз. Аҳәааҿы ауадаҩрақәа шцәырымҵуа.
Гәынба Ақыҭанхамҩа аминистрра анапынҵа аиҭеит ашәыр адкыларатә ҭыԥқәа русураз ауааԥсыра адырра рырҭаларц.
Аҳәынҭқарратә аҳазалхратә усбарҭеи, АШәМ аҳәаахьчаратә гәыԥи, Аҩнуҵҟатәи аусқәа рминистрреи анапынҵа риҭеит ауааԥсыра рҽаҩра аҭираз ацхыраара рыҭаразы русура еиқәдыршәаларц.