АҞӘА, ԥхынҷкәын 7 — Sputnik. Аҟәа Аршба имҩаду аҿы игылаз уаанӡатәи аферментациатә зауад ахыбра изакәанымкәан ақәгара рҽазыршәеит, ҳәа Sputnik иазеиҭеиҳәеит Аҭоурыхтә культуратә баҟақәа рыхьчаразы аҳәынҭқарратә усбарҭа аиҳабы Гарри Сангәлиа.
Иара иажәақәа рыла, XX -тәи ашәышықәса алагамҭазы иргылаз ахыбра Аҭоурыхтә культуратә баҟақәа рсиа иахыԥхьаӡалоуп.
"Ҳара еилаҳкааит Ақалақьтә хеилак аҟны ақәгаразы азин шрырымҭаз, дара ишырхатәу азы макьана ашәҟәқәагьы шхартәаам, апроектгьы ыҟаӡам. Аус еилҳаргоит", — иҳәеит Сангәлиа.
Сангәлиа иазгәеиҭеит ахыбра згаз Аҵара аминистрреи аусбарҭеи дрыдымҵаалакәан арбгара дшалагаз.
Ахыбра хынтә амца акхьан, аха уи мзызӡам арбгаразы – ахыбра атехникатә ҭагылазаашьа ҭҵааны иҷыдоу аӡбара ыҟазароуп ҳәа иҳәеит Абаҟақәа рыхьчаразы аҳәынҭусбарҭа аиҳабы.
Сангәылиа иазгәеиҭеит, аргылаҩцәеи аиҭашьақәыргылаҩцәеи иҟарҵаз алкаақәа рыла, абаҟа аиҭашьақәыргылара ишаҵанакуа.