Аҭоурыхҭҵааҩ Валикәа Ԥачлиа — ҩбара зламыз уаҩын, амцҳәашьа ззымдыруаз иашарыла адәы дықәын, абасала аҵарауаҩ дигәалаиршәеит аҭоурыхтә ҭҵаарадыррақәа рдоктор Аслан Аҩӡба.
Аԥсуаҭҵааратә институт аҿы имҩаԥысит аҵарауаҩ, аҭоурыхҭҵааҩ Валикәа Ԥачлиа диижьҭеи 75 шықәса аҵра инамаданы игәалашәара иазкыз аиԥылара.
"Валикәа Маџьыҭ -иԥа аӡәгьы игәы нимырхацызт, аха иара игәы нзырхоз ауааи аҭагылазаашьақәеи ыҟан. Иҭиҵаауаз ҳаибашьра аҭоурых ауп, уара аамҭак иуцану рҭоурых анҭыуҵаауа даара ицәгьуп, избан акәзар аамҭак иуцану ауаа рыӡбахә бзианы иуҳәар рҭахуп, дара ишырҭахым ианыуҳәалакгьы ӷас ушьҭырхуеит, ачынуаа ануеиҳабу уԥсҭазаара дыруадаҩуеит, убас аҭагылазаашьақәа дрықәшәаны дыҟан, аха уи даҵахеит ҳәа ҳзыҳәом, илшоз ҟаиҵеит", — иҳәеит Аҩӡба.
Валикәа Ԥачлиа — арратә ҭоурыхҭҵааҩ, аҭоурыхтә ҭҵаарадыррақәа ркандидат, Дырмит Гәлиа ихьӡ зху Аԥсуаҭҵааратә институт аҭҵаарадырратә усзуҩ нага. Иара иаԥиҵеит Аџьынџьтәылатә еибашьра Ду, ақырҭуа-аԥсуа еибашьра, иааидкыланы Аԥсуа Арбџьарамчқәа рҭоурых иазкны аусумҭақәа. Инапхгарала иаԥҵан Аԥсны аҳәынҭқарра атәылахьчара аминистрра архив.
Шәахәаԥш арадиостудиаҟынтәи инарҭбаау авидеонҵамҭа.