АҞӘА, ԥхынҷкәын 7 — Sputnik. Аԥснытәи ацитрустә шәырқәа зқәу аидарамҩангагақәа Урыстәыла аҳәаа ԥынгылада иахысуеит ҳәа Sputnik иазеиҭеиҳәеит ақыҭанхамҩа аминистр и.н. Беслан Џьопуа.
Уи иажәақәа рыла, аҳазалхратә усмҩаԥгатәқәа аамҭа рацәаны иагоит агәаҭарақәа ахьдрырӷәӷәаз иахҟьаны.
"Амашьынақәа аурыжьҭуеит, дара хәыц-хәыц игәарҭоит, иҳамоу адыррақәа рыла, акарантинтә хәаҷа-маҷа уаҳа џьара иԥшаамызт", — ҳәа иҳәеит Џьопуа.
Ахәаша адырра ҟаҵан Урыстәылеи Аԥсни рҳәааҿы афитосанитартә хылаԥшра амҩаԥгараан аҳәаа иахыргоз ацитрустә шәырқәа рпартиак аҟны ахәаҷа атрипс ҳәа изышьҭоу шыԥшааз. Уи аҳәаа иахырмыжьит.
Убри аан, "Россельхознадзор" иазгәанаҭеит Аԥснынтәи аекспорт ахыгара шаанкылам, аидара агәаҭара еснагь еиԥш ишымҩаԥысуа.