АҞӘА, ԥхынҷкәын 8 — Sputnik. Гәдоуҭа ӡыла еиқәыршәалахоит афымцамч аныҟоу ҳәа Sputnik иазеиҭеиҳәеит аҭыԥантәи "Аӡыршьҭра" анџьныр хада Роман Тәанба.
Иара иазгәеиҭеит, Гәдоуҭа араиони ақалақьи ӡыла реиқәыршәара ҩ-цәаҳәак рыла ишымҩаԥысуа – Аԥсҭатәи аӡхагалагатә станциа инаркны зхала ицо ацәаҳәа аҟынӡа. Урҭ руак аус амуазар, ауааԥсыра инагӡаны ӡыла реиқәыршәара залшаӡом.
Алашара андырцәо аамҭазы, аӡы зауа зхала ицо ацәаҳәа азааигәара инхо мацара роуп. Ҭәанба иажәақәа рыла, ақалақь аҿы зхала ицо аӡы зауа ахатәы ҩнқәеи аҩнеихагылақәа актәи аихагыаҿ инхои роуп.
Уаанӡа, "Амшынеиқәафымцамч" иакьыԥхьыз аамҭеихша ҿыц инақәыршәаны ҽынла ауааԥсыра алашара роуеит ԥшь-сааҭки 40 минуҭи.