АҞӘА, ԥхынҷкәын 13 - Sputnik. Аицлабра "Ажәақәа ршьагәыҭ" мҩаԥысит Аԥсны.
Аицлабрахь ирыдыркылон аԥсуеи аурыси лингвистикатә культуреи, аҿаԥыцтә фольклори ирызку аҟазаратә проектқәа, амедиа формат ҿыцқәа – авидео, аподкаст, амультимедиа
Аноминациа “Есуахатәи алакә ҿыц” аҿы актәи аҩаӡара змоу адиплом ианаршьеит Алим Арӡынба.
Аноминациа "Ацифратә ажәа" аҿы актәи аҭыԥ ааныркылеит Мариам Тҟьебучааԥҳаи Баграт Багаҭелиеи.
Аноминациа "Арт-ажәа" аҿы аиааира ргеит Валериа Бгьеуԥҳа, Арифа Гәынԥҳа, Адилиа Џьоџьуаԥҳа, Данаҭ Ҭаркьыл.
Аԥсуа литература ашьаҭаркҩы Дырмит Гәлиа диижьҭеи 150 шықәса ахыҵра иазкыз иҷыдоу аноминациа "Аҟаза иажәа" аҿы иалкаан Октаи Узун-Иақәыԥ-Оглыи Валериа Каџьаиаԥҳаи.
Иреиӷьу авидеонҵамҭақәа "Абаза-ТВ" ахәылԥазтәи адырраҭараҿы идырбахоит.
Аицлабра "Ажәақәа ршьагәыҭ" Аԥсуаҭҵааратә институти, Аԥсны аҵарадырра аминистрреи, Нхыҵ-Кавказтәи афедералтә университети русеицура аҳәаақәа ирҭагӡаны хынтәуп имҩаԥысуеижьҭеи. 6-11 аклассқәа рҿы аҵара зҵо аҵаҩцәа рзы аҟаза-иклассқәа мҩаԥган Аҟәа, Афон Ҿыц, Очамчыра, Пицунда, Гәдоуҭа ақалақьқәа рҟны.