АҞӘА, ԥхынҷкәын 17 - Sputnik. Аԥсуа литература ашьаҭаркҩы Дырмит Гәлиа ибиуст аартын иара ихьӡ зху Аԥсуаҭҵааратә институт аҟны.
Ауснагӡатә мҩаԥысит Жәлар рпоет диижьҭеи 150 шықәса аҵра иазкны имҩаԥысуа ауснагӡатәқәа рҳәаа иҭагӡаны.
Аԥсуаҭҵааратә институт аиҳабы Арда Ашәба иқәгылараҟны иазгәеиҭеит аԥсуа литературеи акультуреи рҿы Гәлиа илагала.
Абиуст автор — аскульптор Амиран Адлеиба. Афинанстә цхыраара — акультура аминистрра.
Аԥсуа сахьаркыратә литература ауасхыр азышьҭаҵаҩ, аԥсуа "Анбан" аиқәыршәаҩ, арҵаҩы, арккаҩы, раԥхьатәи аԥсуа ҭҵаарадырратә усумҭақәа равтор, раԥхьатәи аԥсуа газеҭ "Аԥсны" аредактор, раԥхьатәи атеатртә труппа аиҿкааҩ Дырмит Иасыф-иԥа Гәлиа диижьҭеи 150 шықәса ҵит. Аԥсны 2024 шықәса Дырмит Гәлиа ишықәсны ирылаҳәоуп.