АҞӘА, ԥхынҷкәын 23 - Sputnik. Адгәыр Ҳаразиа ипарламенттә мандат имххар ҟалоит аӡбарҭа ахарадҵаратә лкаа ҟанаҵар ҳәа Sputnik иазеиҭеиҳәеит Аҳәынҭқарра-зинтә политиказы апарламенттә еилакы ахантәаҩы Дауҭ Хәытаба.
Аамҭаԥҵәа инақәыршәаны, Жәлар Реизара аусура иацҵахоит хҩык адепутатцәа рыҟамзараангьы ҳәа еиҭеиҳәеит Хәытаба.
Ԥхынҷкәын 19 рзы Аԥсны Жәлар Реизара-Апарламент аҿы иҟалаз ахысрақәа ирыхҟьаны дҭахеит адепутат Вахтанг Гәаланӡиа, дырхәит адепутат Кан Кәарҷиа. Ауаҩы дишьит ҳәа агәҩара ззыҟоу адепутат Адгәыр Ҳаразиа дыбналт.
Ԥхынҷкәын 21 рзы Апарламент изаамҭанытәим аилатәараҿы адепутатцәа зегьы еицҿакны рыбжьы рҭиит иара апарламенттә мандат имхразы.