АҞӘА, ԥхынҷкәын 26 - Sputnik. 2024 ашықәсазы Аԥсны иреиӷьу аспортсмен ҳәа далкаауп анапылампыласҩы Ҭемыр Исмоилов.
Аҿари аспорти русқәа рзы аҳәынҭеилакы асоциалтә ҳақәа рҿы абжьыҭара мҩаԥыргеит. Аспорт абзиабаҩцәа еиуеиԥшым адисциплинақәа рҿы ақәҿиарақәа зауз 10-ҩык аспортсменцәа рҟынтәи еиӷьны иршьаз далырхит.
Ҭемыр Исмоилов – анапылампыл азы Аԥсны аспорт азҟаза, Урыстәыла Ачемпионат Иреиҳаӡоу Алига "Б" зхы алазырхәуа акоманда "Аԥсны" ахәмарҩы. 2024 шықәсазы Гагратәи акоманда далахәны ареспублика ачемпионс дҟалеит, ачемпионат аҿы иреиӷьу ажәылаҩ ҳәа дыԥхьаӡан.