АҞӘА, ԥхынҷкәын 27 - Sputnik. Аԥсны ашәарҭадаратә маҵзуреи аҩнуҵҟатәи аусқәа рминистрреи Жәлар Реизара адепутат Адгәыр Ҳаразиа иԥшаареи, иаанкылареи рзы аусԥшаарақәа еицымҩаԥыргоит.
Абри атәы рҳәеит азинхьчаратә усбарҭақәа русзуҩцәа Аԥсны АҩА рминистр ин.н. Роберт Кьиут имҩаԥигаз аилатәараҟны.
"Аҳәынҭқарратә ҳәааҿы аусԥшааратә ҟәша аусура рӷәӷәоуп, аушьҭырҭатә ҭыԥқәеи ацҳаи рыла ииасуа ахылаԥшра арҭоит. Урыстәылатәи аҳәаахьчаҩцәеи ҳареи "имаӡоу" ахыҵырҭақәа рҟны аҷаԥшьара рӷәӷәоуп. Иахьатәи ҳаамҭазы закәаншьаҭада аҳәынҭқарратә ҳәаа ахысра ус имариаӡам", - иҳәеит АШәМ ахада Дмитри Қәычбериа.
Қәычбериа иажәақәа рыла, русзуҩцәеи урыстәылатәи рколлегацәеи дареи еицхырааны амшынтә хырхарҭагьы хылаԥшра арҭоит.
Аԥсны АҩА рминистр ин.н. иазгәеиҭеит, азинхьчаратә усбарҭақәа русзуҩцәа рхықәкы - ацәгьоура ҟазҵаз иԥшаареи ашьаус иақәыршәареи роуп.