Амузыкаҭҵааҩ, аҵарауаҩ-афольклорист, Аԥсны аҟазара зҽаԥсазтәыз аусзуҩ, Ахьӡ- аԥша аорден ахԥатәи аҩаӡара занашьаз Иуана Шамба диижьҭеи 75 шықәса ҵит иахьа. Иара далгахьан Аҟәатәи амузыкатә ҵараиурҭа, Саратовтәи аконсерваториа. Иуана Сафар -иԥа аамҭак азы ашәа иҳәон Аҳәынҭқрратә хортә капеллаҿы, дирижиорс дыҟан Жәлар рышәаҳәареи рыкәашареи ансамбль аҿы, ансамбль "Риҵа" асахьаркыратә напхгаҩыс, адирижиорс, Аԥсуа ҳәынҭқарратә драматә театр аҿы еиҿикаахьан ансамбль "Уарада", Аԥсны Жәлар Рџьынџьтәылатә еибашьраан Гәымсҭатәи афронт аҟны акультуреи аҟазареи русзуҩцәа рвзвод адҵаҟаҵаҩс дыҟан, напхгара аиҭон Аҟәатәи амузикатә ҵараиурҭа.
Иуана Шамба арадио Sputnik аефир аҿы дылгәалалыршәеит Аԥсны Жәлар рартистка, ансамбль "Гәында" асахьаркыратә напхгаҩы Роза Чамагәуаԥҳа.
"Аԥсуа қыҭақәа дрылсны ажәлар рашәақәа реизгара ихықәкын. "Аԥсуа жәлар рашәақәа" ҳәа 1986 шықәсазы ишәҟәы ҭыҵит. Уи ауаҩы дзыргәырӷьо ауп, ашәҟәы иананыла иӡӡом урҭ ашәақәа. Аԥсуа жәлар рҟазараҟны даара ихәарҭа дуны иҟоу шәҟәны иҭижьит, имал дууп", - лҳәеит Чамагәуаԥҳа.
Аицәажәара инеиҵыхны ишәаҳар шәылшоит аудиофаил аҟны хыхь.