АҞӘА, ажьырныҳәа 22 — Sputnik. Аԥсни Приднестровиеи рыжәларқәа реизҳазыӷьара ахьӡала, наҟ-ааҟтәи аинтересқәа змоу ахырхарҭақәа зегь рҟны аҳәынҭқаррабжьаратә еизыҟазаашьақәа рыҿиара ԥхьаҟагьы иацырҵалоит.
Адәныҟатәи аусқәа рминистр инапынҵақәа назыгӡо Сергеи Шамба Приднестровиатәи иколлега Витали Игнатиев идиныҳәалеит аиҩызареи аусеицуреи рзы Аиқәшаҳаҭра анапаҵыҩра 32 шықәса ахыҵра.
"Аиқәшаҳаҭра иалнаршеит еиуеиԥшым ахырхарҭақәа ирыҵанакуа жәабала аусбарҭабжьаратә еиқәшаҳаҭрақәа рыбжьаҵара, урҭ рыбзоурала Аԥсны Аҳәынҭқарреи Приднестровиатәи Молдавиатәи Ареспубликеи реизыҟазаашьақәа аиҩызара ӷәӷәа шьаҭас измоу, агәазыҳәарақәа ҳасаб рзызуа, агәаартреи агәреибагареи рыпринципқәа иреиҳаӡоу рыҩаӡара аҟынӡа инеит", — ҳәа аҳәоит адныҳәаларатә шәҟәаҿы.
Аԥсны аҳәынҭқарра аҭоурых аҿы раԥхьаӡатәи Жәларбжьаратәи Аиқәшаҳаҭра анапаҵыҩра мҩаԥысит ажьырныҳәамза 22 1993 шықәсазы Приднестровиатәи Молдавиатәи Ареспубликеи Аԥсни рыбжьара.