АҞӘА, ажьырныҳәа 28 - Sputnik. Сергеи Дбар ихьӡ зху Гәдоуҭатәи амузеи аҿы Аҟәатәи алицеи-интернат ашьаҭаркҩы, раԥхьатәи анапхгаҩы Леила Ачԥҳа диижьҭеи шәышықәса аҵра иазкны афотоцәыргақәҵа аатит.
"Асовет аамҭазы, ҳара ҳанстудентцәаз, Леила Ачԥҳа лыхьӡ агазеҭқәеи акьыԥхьымҭақәеи зегьы рҿы, арадио ала иааиԥмырҟьаӡакәа иуаҳауан. Саҭанеи-Гәашьа длыҿдырԥшуан. Лара еиуеиԥшым аиԥыларақәа мҩаԥылгон, аҿар еидылкылон, урҭ аԥсуареи Аԥсадгьыл абзиабареи рылалааӡон", - ҳәа лҳәеит амузеи аиҳабы Гәыгәца Џьыкырԥҳа.
Амузеи иаҭааит Леила Ачԥҳа лҭаацәа, лааӡамҭацәа, лқыҭауаа, зхатәы программа еиқәыршәаны измаз аинтернат анапхгареи аҵаҩцәеи.
Аусмҩаԥгатә шьақәгылан Аԥсны Аџьынџьтәылатә еибашьраеи змаҵуратә уалԥшьақәа рынагӡараани иҭахаз ашкол-интернат аҵаҩцәа ргәалашәара ала.
Амузеи аиҳабы Гәыгәыца Џьыкырԥҳа лажәақәа рыла, урҭ рсиа 54-ҩык рыла ишьақәгылоуп. Аусмҩаԥгатә ахь ааԥхьара рыҭан урҭ рыуацәеи, рҭынхацәи, ирыцеибашьуази. Дара рахьынтәи 11-ҩык Аԥсны Афырхаҵа ҳәа ахьӡ ҳаракқәа рыхҵоуп.