АҞӘА, ажьырныҳәа 30 - Sputnik. Аԥсны Урыстәылеи иареи рҽеимаданы иаҩызам атәылақәа аҳәынҭқарра ахада иалхрақәа рыҽрылагалара раԥырҟәҟәаара иазхиоуп ҳәа иҳәеит Москва иҟоу Аԥсны Ацҳаражәҳәарҭа абжьгаҩ Кан Ҭаниа.
Иара иҳәеит Аԥсны азы ас еиԥш иҟоу атәылақәа рсиа Урыстәылатәи асиа ишақәшәо.
"Ҳара аҭагылазаашьа ҳашьклаԥшуеит. Урыстәылатәи аекспертцәеи аҟазауааи ҳацырхырааны, хымԥада, усеиԥш аҽалагаларақәа аҭыԥ роур, урҭ раԥырҟәҟәааразы азакәан аҳәаақәа ирҭагӡаны аӡбарақәа ҳадаҳкылап ҳәа сгәы иаанагоит", — ҳәа инаҵшьны иазгәеиҭеит Ҭаниа.
Аҳәынҭқарра ахада заанаҵтәи иалхрақәа мҩаԥгахоит жәабран 15 рзы. Аԥсны ахадарахьы кандидатцәас иқәгылоуп Бадра Гәынба, Роберт Аршба, Адгәыр Арӡынба, Олег Барцыц, Адгәыр Хәырхәмал.