АҞӘА, ажьырныҳәа 30 - Sputnik. Ажьырныҳәамза алагамҭазы зхәыҷқәа амца иалаблыз Ҷолариаа рҭаацәара рзы аҩн ҿыц дыргылоит ҳәа Sputnik иазеиҭеиҳәеит Гал араион ахада Константин Ԥлиа.
"Ишырҳәо еиԥш, напеилаԥсала зегьы ацхыраара ҟарҵоит. Урҭ рхыԥхьаӡараҿы иҟоуп еиуеиԥшым афондқәа, ахәыҷқәа рзинқәа рзы Азинмчра змоу, араионқәа рхадацәа зегьы рхатә ԥарақәа аларгалоит ", — иҳәеит иара.
Аԥхьа идыргылоит акоттеџь ҩны, анаҩс ахаҳә ҩны. Ақыҭауаа аус руеит: аҩны ашьаҭа ҭадырҭәахьеит, ашҭеи аандеи рышьаҭа ҟаҵоуп. Абетони ахаҳәрҷҷеи ааргеит аҭыԥантәи анаплакҩцәа, Аԥсны ахадарахь акандидатцәагьы рлагала ҟарҵеит. Аамҭакала иҭахаз ахәыҷқәа рбаҟагьы аргылара иаҿуп ҳәа азгәеиҭеит Ԥлиа.
Ажьырныҳәа 5 рзы Папанырхәа (ԥыхьатәи Саберио) ақыҭаҿы иҟалаз амцакраан иҭахеит хәҩык аиҳәшьцәа Ҷолариаа.
Ахәыҷқәа ранду амца анеиқәылҵоз абензини агази лцәеилагеит ҳәа агәазҩара ыҟоуп. Зегь иреиҳабыз 8-шықәса лхыҵуан, аиҵбы шықәсык лхымҵӡацызт.
Аԥсны ажьырныҳәа 6 рзы алахьеиқәратә мшны ирылаҳәан.