АҞӘА, жәабран 4 - Sputnik. Урыстәылатәи иреиҳау аҵараиурҭақәа Аԥсны адгылара арҭеит иуадаҩыз 90-тәи ашықәсқәа раан ҳәа иҳәеит ААУ жәларбжьаратәи аизыҟазаашьақәеи аекономикатә усқәеи рзы аректор ихаҭыԥуаҩ Максим Ӷәынџьиа.
Урыстәылатәи иреиҳау аҵараиурҭақәа Аԥснытәи астудентцәа рыдкылара иабзоураны ицәырҵит ззанааҭдырра ҳараку аҟазацәа, анаҩс рыԥсадгьыл ахь ихынҳәны ахәшәтәырҭақәеи, ашколқәеи, егьырҭ акыр зҵазкуа аусхкқәеи рҿы аусура иалагеит.
"Ирацәоуп Урыстәылатәи ауниверситетқәеи ҳареи иҳабжьоу аиқәшаҳаҭрақәеи апроектқәеи. Москватәи аҳәынҭқарратә апедагогикатә университет акәзар — ԥшьба. Уажәазы Урыстәылатәи ауниверситетқәеи ҳареи ҩганктәи аиқәшаҳаҭрақәа 80 рҟынӡа иҟоуп".
Иара иажәақәа рыла, Аԥсны аҵарауаа ҿарацәа рзы аспирантура — аҵарадырра аҿиаразы мҩа заҵәыкны иҟоуп.
"Араҟагьы Урыстәыла ҳара ҳзы, аҿиареи ҳҟазара аизырҳареи рзы ихадароу хыҵхырҭаны иҟоуп. Убри аҟнытә, Урыстәыла зегь рыла ихадоу партниоруп, ҩызоуп. Насгьы абарҭ апроектқәа зегьы рҿы иҳацхраауа акәны иҟоуп", - ҳәа иҳәеит иара.