АҞӘА, жәабран 6 - Sputnik. Уаҵәы еиҭашьақәыргылоу Аҟәатәи аҳаирбаӷәазаҿы аԥышәаратә ԥырра мҩаԥыргоит. Аԥхынтәи асезон алагамҭазы иааиԥмырҟьаӡакәа аҳаиртә еимадара аартра ҳазыԥшуп ҳәа иҳәеит Урыстәыла Атранспорт аминистр Роман Старовоит Аԥснытәи аполитикатә усзуҩ Бадра Гәынба иԥылараан.
"Ҳара ҳзы даара акраҵанакуеит агәыларатә Аԥсни ҳареи атранспорттә еимадара ҳабжьазаара. Ҳара акырӡа аахыс еимабзиоу еигәылацәоуп, шәара ижәдыруеит 2014 шықәса инаркны Шәача, Адлер ақалақьқәа рҿи рыкәша-мыкәшеи ашықәс зегьы иалагӡаны аус зуа акурорт ду аус шауа. Ҳәарада акурорт асасцәа Аԥсны ишаҭаауа. Урыстәыла ауааԥсыра зысасдкылашьа дуу Аԥсны аԥсшьара аинтерес рымоуп. Уи еснагь еиԥылара бзиоуп, еснагь мра ҟәымшәышәуп, мшын ҟәандоуп. Убри азы ҳара еицаҳуалуп атранспорт еимадара маншәаланы аҟаҵара", — ҳәа иҳәеит аминистр.
Бадра Гәынба иазгәеиҭеит, ари апроект Аԥсны ауааԥсыра рзы иамоу аҵак ду.
"Ҳара ҳзы даара акраҵанакуеит ҳтәылақәа реимадара аиӷьтәра зызку аинфраструктура аҿиара. Иахьа Ԥсоу аӡиас аҿы Урыстәылеи Аԥсни ртәылауаа рныҟәара алзыршо агәаҭара-аушьҭратә ҭыԥ ҳамоуп. Ҳәарада Аҟәа Жәларбжьаратәи аҳаирбаӷәаза аартра ҳаизыҟазаашьақәа рхаҭабзиара ҳаранакуеит, аекономикатә лшарақәа еиӷьнатәуеит. Ҳара акыр ҵуеит ари азҵаара аӡбара ҳазыԥшызижьҭеи", - иҳәеит иара.
Владислав Арӡынба ихьӡ зху Аҟәатәи аҳаирбаӷәаза ыҟоуп Гәылрыԥшь араион, Бабышьыра ақыҭан. Аха 1993 шықәса аахыс уи аԥырразы иаркын.
2023 шықәса абҵарамзазы Урыстәылеи Аԥсни рыбжьара аҳаирбаӷәаза аиҭашьақәыргыларазы аиқәшаҳаҭра рыбжьарҵеит, жәларбжьаратәи аҳаиртә еимадара аиҭашьақәыргылара хықәкыс иҟаҵаны. Уажәнатә 300-ҩык усура ҭыԥла еиқәнаршәахьеит, урҭ рҟынтәи 207-ҩык Аԥсны иатәылауаауп.