АҞӘА, жәабран 6 - Sputnik. Урыстәыла азҿлымҳауп Аԥсни ҳареи ҳаизыҟазаашьақәа аринахысгьы рыҿиара ҳәа иҳәеит Урыстәыла адәныҟатәи аусқәа рминистр Сергеи Лавров Аԥснытәи аполитикатә усзуҩ Бадра Гәынба иԥылараан.
"Ҳара ҳусеицура аԥхьаҟагьы арӷәӷәара ҳазҿлымҳауп. Ҳабжьара ахәаахәҭратә еикәыршара аизҳара иаҿуп, иҳаҩсыз ашықәс азы Аԥсны аҩныҵҟатәи аалыҵ азеиԥш хашәалахәы 8% рыла иазҳаит. Агәра аагоит ҳаимадарақәа аекономика аизҳара, асоциалтә проблемақәа рыӡбара, атәылауаа рыбзазара аиӷьтәрахь ишкылнаго", — ҳәа иҳәеит Лавров.
Аминистр иазгәеиҭеит абри аконтекст аҿы, Урыстәыла Аҟәатәи аҳаирбаӷәаза иаарласны аартра ишазыԥшу.
"Аҳаирбаӷәаза аартра атуризм аҿиара акырӡа иацхраауеит, еицырдыруа ԥыхьатәи Асовет Еидгыла абырлаш ҭыԥ – Аԥсны аҭаара арҭбаауеит", – ҳәа иҳәеит Лавров.
Уи адагьы, Урыстәыла АдәАР Аԥсны имҩаԥысраны иҟоу заанаҵтәи атәыла ахада иалхрақәа дазааҭгылеит, урҭ еиҿагыларада имҩаԥысып ҳәа дшақәгәыӷуа азгәеиҭеит.
"Ҳара иаадыруеит шәара алхрақәа шшәымоу, даарагьы агәыӷра ҳамоуп урҭ Аконституциа инақәыршәаны, еилаҩеиласрак ҟамҵакәа ишымҩаԥысуазы, аԥсуа жәлар ргәазыҳәара хақәиҭрала, демократиатә мҩала аарԥшразы иахәҭоу зегьы шыҟаҵахо", — ҳәа азгәеиҭеит Лавров.
Аминистр, иара убас, Гәынба аурыс-аԥсуа еизыҟазаашьақәа рыҿиараҿы илагала ахәшьара аиҭеит, Урыстәыла аԥсуа политик илагала ахә ҳаракны ишьо иазгәеиҭеит.
"Сгәыӷуеит, иахьа ԥхьаҟатәи агәҭакқәа ҳрылацәажәап ҳәа еиуеиԥшым аҭыԥқәа – аекономика, азин, акультура, жәаҳәарада, аҳәынҭқарра ахада ихаҭыԥуаҩ иусура аҿы ишәымоу аԥышәа ҳасаб азуны", — ҳәа инаҵшьны иазгәеиҭеит Лавров.
Гәынба иҳәеит Урыстәыла Аԥсны азы акыр зҵазкуа, ареспубликаҿы аҭынчреи аҭышәынтәалареи рыхьчараҿы гарантуп ҳәа.
"Ҳара Урыстәылатәи Афедерациа шықәсырацәала иҟанаҵо зегьы рыхә ҳаракны иаҳшьоит. Ҳара ҳаигәырӷьоит Урыстәылатәи Афедерациеи ҳареи еицаҳзеиԥшу економикатә ҵакырак аҿы аҿиара ҳауртә алшара ахьыҟоу. Жәаҳәарада, Аԥсны ауааԥсыра ахә ҳаракны иршьоит Урыстәыла ҳтәыла ахьыԥшымра азхаҵарала шәышықәсалатәи ҳгәыӷра анагӡара ахьалнаршаз", — ҳәа иҳәеит Гәынба.
Аиԥылара аҩ-ганктәи аизыҟазаашьақәа рыҿиара инацҵаны аизҳара анаҭоит ҳәа агәра шиго азгәеиҭеит, иара убасгьы Лавров арегион аҿы аҭышәынтәалара ашьақәыргыларазы илагалазы ҭабуп ҳәа иеиҳәеит.