АҞӘА, жәабран 6 - Sputnik. Урыстәыла Аԥсны ацхыраара анаҭоит Аиааира агара 80 шықәса ахыҵра иазку Аџьынџьтәылатә еибашьра Ду афырхацәа рбаҟақәа зегьы реиҭашьақәыргыларазы, уи азы ахарџь азоужьҭуп хаҭала Владимир Путин иҟаиҵаз адҵала.
Абри атәы иҳәеит Урыстәыла ахада Иусбарҭа анаԥхгаҩы актәи ихаҭыԥуаҩ Сергеи Кириенко Москва Аԥснытәи аполитикатә усзуҩ Бадра Гәынбеи иареи реиԥылараан.
"Сара Аҟәа саныҟаз, иахьабалак Аиааира 80 шықәса ахыҵра аҽазыҟаҵара иазку азҵаара шьҭырхуан. Ииашоу зҵаароуп, ари Аиааира ҳара зегьы иаҳзеиԥшуп, насгьы Аџьынџьтәылатә еибашьра Ду афырхацәа ҳзеиҩшаӡом. Аԥсны иалҵит хыԥхьаӡара рацәала афырхацәа – азеиԥш Аиааиразы иқәԥоз, уи зхы ақәызҵаз", — иҳәеит Кириенко.
Иара иазгәеиҭеит, атәыла ахада Владимир Путин иҟаиҵаз адҵақәа инарықәыршәаны, апрограмма ду шынагӡахо, уи аҳәаақәа ирҭагӡаны иазгәаҭоуп иарбан мемориалзаалак, иарбанзаалак нышәынҭразаалак зегьышеиҭашьақәыргылахо.
Иааиуа амчыбжь азы Аԥсныҟа иаара ҟалоит атәыла ахада ифонд ахаҭарнакцәа, араионқәа рхадацәеи ашколқәа реиҳабацәеи дареи еицырзеиԥшу ауснагӡатә алацәажәаразы.
"Аиааира 80 шықәса ахыҵраан. Лаҵара 9 рҟынӡа аусқәа зегьы хымԥада ихыркәшатәуп. Агәра ганы сыҟоуп, ҳазегьы ҳаицхырааны уи шҳалшо", - ҳәа иажәа хиркәшеит Сергеи Кириенко.