Урыстәыла Аԥсны ашколқәа автобусқәа рыла еиқәнаршәоит. Абри атәы ҳәан Урыстәыла ахада Иусбарҭа анаԥхгаҩы актәи ихаҭыԥуаҩ Сергеи Кириенко Аԥсны иаҭаараан. Гагра араион аҟны ашколқәа автобусла иахьынӡеиқәыршәоу, насгьы ари азҵаара иҵарны дара рҟны иахьынӡақәгылоу атәы арадио Sputnik аефир аҟны еиҭалҳәеит араион аҵараҟәша аиҳабы лхаҭыԥуаҩ Мактина Сыҷынааԥҳа.
"Ҳраион азеиԥш ҵараиурҭақәа рхатәы автобусқәа рымаӡам. Араион ахадара даара ацхыраара ҳарҭоит Гьечрыԥшь, Пицунда, Асычқәантә иаауа ҳҵаҩцәа машьынала реиқәыршәаразы. Аҵара аминистрра ианҳзаарыцҳа автобусқәа Урыстәылантә иаарышьҭуеит ҳәа, идәықәаҳҵеит аҭахҳәага ҳраион аҟны ихымԥадатәны ԥшь-автобуск зларҭаху ала", - лҳәеит Сыҷынааԥҳа.
Аицәажәара инеиҵыхны ишәаҳар шәылшоит аудиофаил аҟны хыхь.