АҞӘА, жьҭаара 7 - Sputnik. Урыстәылатәи аспециалистцәа Аҟәаҟа иааит Амилаҭтә сахьаҭыхратә галереиа абылраан амца иацәынхаз асахьақәа реиҭашьақәыргылара аҽазыҟаҵаратә усурақәа рымҩаԥгаразы.
"Уажәы Амилаҭтә библиотека ахыбраҿы ҳаҟоуп, асахьақәа зегьы рыхьчара аҭагылазаашьаз ахҳәаа раҳҭоит, рсериатә номерқәа еиҿҳарԥшуеит, амҩангаратә еилакы урҭ ралкаареи реиқәыршәареи еиҳа ирзымариахарц азы", - ҳәа еиҭеиҳәеит Аурыс музеи асахьаҭыхҩы-ареставратор Иван Безсолицин.
Аиҭашьақәыргылара ахьымҩаԥысуа Урыстәыла акәу Аԥсны акәу макьана еилкааӡам, уи азы аицәажәарақәа цоит. Дара ражәақәа рыла, аиҭашьақәыргыларатә усурақәа акыр шықәса иадхалоит, иараубасгьы асахьақәа зегьы еиҭашьақәургыло иҟаӡам.
Аха зегьы маншәалахар, еиҭашьақәыргылахо аусумҭақәа рцәыргақәҵа еиҿкаахар ҟалоит.
2024 шықәса ажьырныҳәамза 20-21 руха Амилаҭтә галереиа аҵәахырҭеи Ацәыргақәҵатә зал хадеи ахьыҟаз Асахьаҭыхыҩцәа реидгыла ахыбра амца ацралеит. Аԥсни аҳәаанырцәи рсахьаҭыхыҩцәа русумҭақәа 4000 рахьынтә 200 роуп еиқәхаз.
Абылара ашьҭахьҵәҟьа, Грабар ихьӡ зху ацентр аҟнытә ареставраторцәа асахьақәа реиқәырхара иалагеит. Жәабранмзазы урҭ рҟынтә 80% рыхьчара рылшеит.
Аԥсны аиҭашьақәыргыларатә усурақәа ирыцҵан. Уи адагьы, Урыстәыла Амилаҭтә галереиа апрофессионалтә реставрациатә лашара ҳамҭас ианаҭеит.