АҞӘА, жәабран 11 — Sputnik. Иҳаҩсыз ԥшьышықәсеи бжаки ирылагӡаны Аԥсны ахатә биуџьет ахашәалахәы 4,8 миллиард мааҭ инаркны 12 миллиард мааҭ рҟынӡа ишьҭыҵит ҳәа азгәеиҭеит (https://t.me/SputnikAbkhazia/26098) Бадра Гәынба аҳәынҭқарра ахадарахьы акандидатцәа алахәны телехәаԥшрала имҩаԥысуа адебатқәа рҿы.
Ари алыршахеит ашәахтәқәа рышьҭыхрала акәымкәа, Аԥсны аекономикаҿы иманшәалоу аҭагылазаашьақәа раԥҵареи анапхгараҭареи рыла.
Аԥсны абиуџьет ахашәалахәы 95% анаплакыҩцәеи абизнесуааи роуп еиҿызкаауа. Убри аҟнытә, абизнес азы аҭагылазаашьа бзиақәа раԥҵара хымԥадатәиуп, льготалатәи акредитқәа рыҭарагьы уахь иналаҵаны. Иара убас ашәахтәқәа рзы азакәанԥҵара аиҭакра амҩаԥгара хымԥадатәиуп.
Уи адагьы, азакәани аҭышәынтәалареи ахьыҟам абизнес аус азуӡом.
Еиҭашьақәҳаргыло аргыларақәа ашәахтә база аизырҳара иацхраауеит. Иаҳҳәап, аҳаирбаӷәазеиԥш иҟоу аобиект аргылара.