АҞӘА, жәабран 13 - Sputnik. Урыстәыла акультура аминистр Ольга Лиубимова 2014 шықәсазы Урыстәылатәи Афедерациа афинанстә цхыраарала еиҭашьақәыргылаз Фазиль Искандер ихьӡ зху Аурыс ҳәынҭқарратә драматә театр даҭааит.
Аминистр атеатр аҭагылазаашьа гәалҭеит, ҳаамҭа иақәшәо игьежьуа асценазы амеханизм ҳамҭас ишыҟарҵо азы адырра ҟалҵеит.
"Иахьатәи атехнологиақәа рхархәара даара акраҵанакуеит. Сара исарҳәеит, уажәазы араҟа асцена напыла ишшәыргьежьуа. Жәаҳәарада, уи аҟыбаҩ змоу ауаа ԥырхагас ирзыҟам, аха иҵегьы иахьатәи аамҭа иақәшәо алшарақәа ыҟазар шьахәуп", — ҳәа азгәалҭеит Ольга Лиубимова.
Атеатр адиректор хада Иракли Хынҭәба Урыстәыла иҟанаҵаз ацхырааразы ҭабуп ҳәа иҳәеит.
"Аҵыхәтәантәи ашықәсқәа рзы аҳәаанырцәтәи аурыс театрқәа адгылара ду рырҭо иалагеит. Урыстәылатәи Афедерациа иахьа аҭакԥхықәра ду иаҵагылоуп аурыс театрқәа, аурыс культура, уи ахаҭарнакцәа раҳасабала реиқәырхареи рырҿиареи рзы, убри аан урҭ акультурақәа еимадазарц, иахьыҟоу атәылақәа ркультурақәа ирыхәҭакны иҟазарц", — ҳәа иҳәеит Иракли Хынҭәба.
Ольга Лиубимова инаҵшьны иазгәалҭеит, аҳәаанырцәтәи аурыс театрқәа рыцхрааразы аӡбара Урыстәыла ахада Владимир Путин 2021 шықәсазы ишидикылаз. Иара убас, аминистр Аԥсны акультура аусзуҩцәа дырԥылеит. Уаҟа ирылацәажәеит аҩҳәынҭқаррак русеицура, акультура ахырхарҭала акадрқәа разыҟаҵара, Урыстәылеи Аԥсни еицырзеиԥшу апроектқәа.