АҞӘА, жәабран 14 - Sputnik. Аҟәа имҩаԥысит Аԥсны ауааԥсыра, еиҳарак аҿар зхатәы проектқәа рыла заалыҵ цәырызгаз, аҭыԥантәи аалыҵқәеи анапҟазареи рфестиваль
Уа иҟан аԥсуа ҳәызбақәеи амилаҭтә шәҵатәи, иара убас ашә, аџьыка, ашәырқалмышьқәа, еиуеиԥшым ачаи хкқәа, аҩы уҳәа убас иҵегьы.
Аусмҩаԥгатә ихы алаирхәит Бадра Гәынба. Иара иазгәеиҭеит, анапҟазареи ажәлар рҟазареи, иара убас, имаҷуи ибжьаратәуи анаплакреи Аԥсны аҿиара аҵак ду шамоу.
Уаанӡа, Бадра Гәынба Москва ақалақь аҿы Новаки иареи реиԥылараҿы, сынтәа Аԥсны имаҷуи ибжьаратәуи анаплакра ацхрааразы шә-миллион мааҭ зҵазкуа афонд аԥҵаразы еицәажәеит.
Ҩышықәса раԥхьа, ауасҭаҟаҵарҭаз аҳәынҭқарратә грант зауз Беслан Воуба аполитик иирбеит иара инапала иҟаиҵаз аԥсуа музыкатә рҳәагақәа. Урҭ арҳәагақәа Аԥсны зҽаԥсазтәыз артист Марина Шьинелиа напгара зылҭо ақыҭа хәыҷқәа ргәыԥ аҿы иадырҳәоит.
"Шаҟа ибзиоузеи ҳкультура, ҳмилаҭтә музыкатә рҳәагақәа зыхьчо ауаа ахьыҟоу. Шаҟа ибзиоузеи урҭ азырҳәо ахьҳамоу. Насгьы, ас еиԥш иҟоу апроектқәа рыцхрааразы агрантқәа ахьыҟоу. Ари аҩыза аус хымԥада иацҵахоит", – ҳәа азгәеиҭеит Бадра Гәынба.
Аҩыҟаҵаҩцәа аҩ-хкы ҿыцқәа агьама ддырбеит, аҵыхәтәантәи ашықәсқәа рзы Аԥсны ажь ааӡара акырӡа аҿиара шамоу азгәарҭеит.
Ансамбль "Гәында" инарыгӡеит "Катиуша", иара убас егьырҭ арҿиамҭақәагьы.
"Аҭоурых иалагӡаны, ҳара ҳхатәы культура змоу ҳәынҭқаррак аҳасабала аҿиара ҳауит. Аԥсны акультура аҳәынҭқарратә ҩаӡараҿы ахьчареи адгылареи хымԥадатәиуп", - ҳәа азгәеиҭеит Бадра Гәынба.