АҞӘА, жәабран 15 - Sputnik. Аԥсны ахада иалхрақәа шьақәгылеит абжьыҭара инеиз ауаа рхыԥхьаӡарала.
Асааҭ 18:00 рызтәи АКХ адыррақәа рыла, ареспубликаҿы рыбжьы арҭеит 55% алхыҩцәа, хыԥхьаӡарала иугозар, 79 019-ҩык ауааԥсыра.
Аԥсны алхратә комиссиа хада ауаа рааишьазы асааҭ 18:00 рызтәи адыррақәа цәырнагеит.
Ауаа рааишьа раионцыԥхьаӡа:
Аҟәа — 22311-ҩык (51%),
Гагра араион — 14008-ҩык (50%),
Гәдоуҭа араион — 15057-ҩык (60%),
Аҟәа араион — 3307-ҩык (56%),
Гәылрыԥшь араион — 7106-ҩык (54%),
Очамчыра араион — 9357-ҩык (57,5%),
Тҟәарчал араион — 2655-ҩык (46%),
Гал араион — 1280-ҩык (65%).
Москва рыбжьы арҭахьеит 2240-ҩык, Черқьесск — 1688-ҩык.
Аԥсны аҳәынҭқарра ахада заанаҵтәи иалхрақәа ирылагеит шьыжьнаҵы асабша, жәабран 15 рзы. Алхырҭатә ҭыԥқәа аадыртит асааҭ 08:00 рзы, ихыркәшахоит асааҭ 20:00 рзы.
Аҳәынҭқарра ахадарахьы иқәгылоуп хәҩык акандидатцәа – Бадра Гәынба, Адгәыр Арӡынба, Роберт Аршба, Олег Барцыц, Адгәыр Хәырхәмал. Аиааира игеит ҳәа дрыԥхьаӡоит алхыҩцәа рзеиԥш хыԥхьаӡара аҟнытә 50 проценти даҽа бжьыки зауз акандидат.