АҞӘА, жәабран 15 - Sputnik. Аԥсны ахада ин.н. Валери Бганба Гагратәи алхратә ҭыԥ №3 аҿы ибжьы иҭиит.
Sputnik акорреспондент даниҿцәажәоз иара иҳәеит игәалаҟазаара шыбзиоу, ахада ҿыц иҟынтәи аҳәынҭқарра аргылара иадҳәалоу аусурақәа рырцыхцыхра дшазыԥшу.
Иахьа Аԥсны ахада заанаҵтәи иалхрақәа мҩаԥысуеит. Атәылаҿы иаартуп 152 алхырҭатә ҭыԥ, Урыстәыла - ҩба.
Гагра ақалақь 3-тәи аҭыԥантәи алхратә комиссиа ахантәаҩы Алла Сыҷынааԥҳа лажәақәа рыла, шьыжьымҭан асааҭ 10:00 рҟынӡа абжьыҭирахь инеихьан 2500-ҩык рҟынтәи 130-ҩык алхыҩцәа.
Аԥсны ахадарахьы иқәгылоуп хәҩык акандидатцәа – Бадра Гәынба, Адгәыр Арӡынба, Роберт Аршба, Олег Барцыц, Адгәыр Хәырхәмал. Аиааира игеит ҳәа дрыԥхьаӡоит алхыҩцәа рзеиԥш хыԥхьаӡара аҟнытә 50 проценти даҽа бжьыки зауз акандидат.