АҞӘА, жәабран 17 - Sputnik. Змаҵура иамырхыз Аԥсны АШәМ ахантәаҩы Дмитри Қәычбериа Sputnik иазеиҭеиҳәеит ахадарахьы акандидат Адгәыр Арӡынба аҭел иара дизасны ахада ин.н. Валери Бганба иахь днеирц шиеиҳәаз.
Ахада ин.н. Бганба иҿы имҩаԥысыз аиԥылараан Арӡынба ида ахада ихаҭыԥуаҩрахь акандидат Алхас Џьынџьалгьы дыҟан.
Абас ишеилатәаз ауп имаҵура дшамырхыз шиарҳәаз.
Қәычбериа иажәақәа рыла, Џьынџьал дҵааит Аԥсны Урыстәыла ацхыраара ыҟамкәа ҳхала ҳҳәаақәа ҳзыхьчома ҳәа.
"Ишиашоу азҵаара соуит (ахада ин.н. В. Бганба иҟынтәи — азгә.) — абриаҟара урыстәылатәи амаҵурауаа иҟарҵои? Ус анакәха, уара унапынҵақәа рынагӡара улшаӡом", — ҳәа азгәеиҭеит Қәычбериа.