АҞӘА, жәабран 20 - Sputnik. "Аиааира адәыӷба" Аԥсныҟа иаараны иҟоуп ҳәа аҳәамҭа ҟаиҵеит Бадра Гәынба.
"Уи адагьы, арҭ аусмҩаԥгатәқәа рҿы хымԥада ицәыргахоит, Аԥсны иалҵыз Асовет Еидгыла ажәларқәа зегьы ирылагыланы Аџьынџьтәылатә еибашьра афронтқәа ирылсыз ҳветеранцәа рекспонатқәа ", — ҳәа иҳәеит иара.
Гәынба иҳәеит сынтәа афашизм аиааира 80 шықәса шахыҵуа. "Ҳара ҳҭоурых ҳхаҳмыршҭыроуп, избанзар, зҭоурых зхашҭыз ԥхьаҟатәи аԥеиԥш рымаӡам. Убри аҟнытә, ҳара ҳзеиԥш ҳәынҭқарра ду ахақәиҭразы иқәԥоз ауаа ргәалашәара ҳаҭыр ақәаҳҵоит".
"Аиааира адәыӷба" – аихамҩала ицо урыстәылатәи музеиуп. Уи ацәыргақәҵатә експозициа аҭоурыхтә ҵабыргреи ҳаамҭазтәи атехнологиақәеи еиднакылоит: абжьы амҽхак, атеатралтә лашара, аголограммақәа, авиртуалтә ҵабырг, уимоу иҷыдоу амеханикатә еффектқәа.