АҞӘА, жәабран - Sputnik. Урыстәыла Аԥсны ҳамҭас ианаҭеит NextPlanet 75 захьӡу аинтерактивтә классӷәқәа 120, урҭ ашколқәа ирзыршахьеит.
Аҟәатәи ахәбатәи ашкол аҿы амаруга ҿыцқәа рышьақәыргылара иалагеит.
Урыстәылантәи иааз арҵаҩцәа аԥснытәи рколлегацәа иддырбеит аинтерактивтә ҭӡы ахархәашьа, иаабац аҵкыс уи злеиӷьу, еиуеиԥшым аурокқәа рҿы ахархәашьа.
Ашкол №5 арҵаҩцәа ари аҿыцрахь даара аинтерес ду аадырԥшит.
"Ҳара даара ҳгәы иахәоит арҭ аҳамҭақәа. Арҭ аклассӷәқәа аамҭа ҿыц иатәуп, апроектор, ма аноутбук уҭахӡам, уа зегьы амоуп", — лҳәеит афизика арҵаҩы Налла Гәымба.
Ашколтә инфраструктура арҿыцра аполитик Бадра Гәынба Урыстәылатәи иколлегацәеи иареи реиԥыларақәа раан ирыбжьарҵаз аиқәшаҳаҭрақәа рыбзоурала иҟалеит. Аинтерактивтә классӷәқәа рыдагьы, Урыстәыла Аҵара аминистрреи Аԥсни русеицура аҳәаақәа ирҭагӡаны, ашколтә автобусқәа Аԥсныҟа иаауа иалагеит, аҭыԥантәи арҵаҩцәа Урыстәыла рҵарадырра аизырҳара иаҿуп.
Уи адагьы, арҵаҩцәа руалафахәы ашәараҟны иҟаз ауалқәа ирыдҳәалоу азҵаарақәа рыӡбара алыршахеит. Урыстәыла ирынаҭаз ажәа нанагӡоит, аиқәшаҳаҭрақәа зегьы иаарласны, инхарҭәааны инанагӡоит.