Атәыла аҩнуҵҟа ашықәс иалагӡаны имҩаԥысуа агастрольқәа, аплан иарбоу аконцертқәеи, арлахҿыхратә усмҩаԥгатәқәеи, иҿыцу ахырхарҭақәеи шьҭа итрадициахаз апроектқәеи ртәы арадио Sputnik аефир аҟны еиҭеиҳәеит Акультура аминистрра акультуреи аҟазареи рыҟәша аспециалист хада Адамыр Гәынба.
Аԥсны акультура аминистрра атәыла аҩнуҵҟа еиҿнакаауа агастрольқәа ирызку апроект шьҭа 2015 шықәса раахижьҭеи аус ауеит иҳәеит Гәынба. Иара иажәақәа рыла, аԥхаррақәа шаашьақәгылалак уи ахацыркра азгәаҭоуп ақалақьқәеи ақыҭақәеи рҟны.
"Ҳаналагоз арҿиаратә коллективқәа 4-5 ракәызҭгьы апроект иалахәыз, есышықәса урҭ рхыԥхьаӡара иацлоит. Иаланагалоит аколлективқәа Акультура аминистрра иаҵанакуа, атеатрқәа, насгьы афильмқәа дырбара. Ҵыԥх Дырмит Гәлиа ииубилеитә шықәсазы иҟан ацәыргақәҵақәа, насгьы аконцерт, еидаҳҳәалон ҩ-усмҩаԥгатәык. Сынтәатәи апроект акәзар, ихиоуп, иаарласны ишьақәҳарӷәӷәараны ҳаҟоуп, ашықәс иҭагӡаны 45 концерт рҟынӡа мҩаԥгахоит", - иҳәеит Гәынба.
Аицәажәара инеиҵыхны шәазыӡырҩыр шәылшоит аудиофаил аҿы хыхь.