АҞӘА, хәажәкыра 1 - Sputnik. Цандрыԥшь 14-тәи алхратә ҭыԥ хадаҿы алхрақәа реилагаразы аҽазышәара ҟаҵан, аха аҭагылазаашьа анапахьы иаагоуп иҳәеит АКХ ахантәаҩы Дмитри Маршьан.
"Абиуллетенқәа зегьы еизгоуп, урҭ рыԥхьаӡара иаҿуп", — иҳәеит Маршьан.
Аколлеџь аҿы иҟоу алхырҭатә ҭыԥ аҿы аҭагылазаашьазы арзаҳал ҳәа акгьы алаҵамызт, уаҟагьы аԥхьаӡарақәа ирҿуп.
Аԥсны Апрокуратура хада ишаанацҳаз ала, асааҭ 19:30 рзеиԥш 20-ҩык рҟынӡа абџьар зкыз ауаа асабрадақәа рхаҵаны Цандрыԥшь иҟоу алхратә ҭыԥ хада №14 алхырҭатә ҭыԥ №5 иақәлеит.
Дара алхратә комиссиа алахәылацәеи амилициа аусзуҩцәеи рыԥсҭазаара ашәарҭара иҭазыргылоз ақәымчра аарԥшны, алхратә кәалаԥ ԥхасҭатәны ацәгьоура аҭыԥ аҟынтәи рҽырӡеит.
Ашьаусԥшаара-оперативтә гәыԥ ахҭыс ахьыҟалаз аҭыԥ аҟны имҩаԥнагоит хырԥашьа змам ауснагӡатәқәа, ацәгьоуцәа азусҭцәоу ашьақәыргылареи раанкылареи рзы аусқәа еиҿыркаауеит.