АҞӘА, хәажәкыра 2 - Sputnik. Урыстәылатәи Афедерациа ахада Владимир Путин Бадра Гәынба Аԥсны ахадас иалхра идиныҳәалеит.
"Ажәлар рхы иақәиҭны ргәазыҳәара аарԥшрала имҩаԥысыз алхрақәа рҟны аиааира ишьақәнарӷәӷәеит Аԥсны атәылауаа аҩнуҵҟатәи аполитикатә ҭышәынтәалареи атәыла еиҳа-еиҳа иҳаракхо асоциал-економикатә ҿиареи рзы Шәара илышәхыз амҩа ишадгыло", — ҳәа аҳәоит ателеграмма атекст аҿы.
Урыстәыла ахада агәрагара ааирԥшит аҩтәылак рыбжьара аиҩызаратәи аусеицуратәи еизыҟазаашьақәа аԥхьаҟагьы ишдырӷәӷәало аҩжәларык ирзеиӷьу аԥеиԥш азы.
Аԥсны ахада иалхрақәа аҩбатәи ртур мҩаԥысит хәажәкыра 1 азы. Рыбжьы арҭеит 70% алхыҩцәа. Заатәи аихшьаалақәа рыла, аиааира игеит Бадра Гәынба, уи абжьқәа рҟынтәи 54,73% иоуит.