АҞӘА, хәажәкыра 3 - Sputnik. Аԥсны атәыла ахада иалхрақәа рҟны таҵахаз аоппозициа аиҳабы Адгәыр Арӡынба иҳәеит, абжьыҭарақәа рҿы ажәлар ралхра ҳаҭыр шақәиҵо, абжьыҭара алҵшәақәа дшаҿамгыло.
"Ҳара ҳаҭыр ақәаҳҵоит ҳмилаҭрацәа ралхра. ... Ҳара абжьыҭара алҵшәақәа рҿагылара ахәҭоуп ҳәа иҳаԥхьаӡом, избан акәзар иҟоуп аҭагылазаашьақәа, уи алшара азымҭо", - ҳәа иҳәеит Арӡынба ашәахьа имҩаԥигаз апресс-конференциаҿы.
Иазгәеиҭеит, иара хаҭарнакра ззуа амчқәа ареспубликаҿы иҟоу аҭагылазаашьа аицәатәра шырҭахым; "Ҳтәыла аԥхьаҟатәи аԥеиԥш азы, аҭагылазаашьа еицәаҳтәуам", - ҳәа иҳәеит аоппозиционер.
Уи иара убасгьы иҳәеит, атәыла ахада иалхрақәа рҿы аиааира згаз Бадра Гәынба "еиҭах иалху аҳәынҭқарра ахада" мацара акәымкәа, ажәлар рԥыза иакәны, аҳәынҭқарра шьақәзаргыло иакәны дыҟазар , иара ивагылара дшазхиоу.