АҞӘА, хәажәкыра 5 - Sputnik. Владимир Путин Урыстәылеи Аԥсни реизыҟазаашьақәа иҷыдоу аҟазшьа шрымоу азгәеиҭеит ҿыц иалху ахада Бадра Гәынбеи иареи реиԥылараан. Абри атәы аанацҳаит Кремль.
"Шәара ижәдыруеит, жәаҳәарада, Урыстәылеи Аԥсни реизыҟазаашьақәа ирымоу иҷыдоу аҟазшьа. Ижәдыруеит иӡбатәу апроблемақәеи, ауаа ззыԥшу аӡбамҭақәеи ртәы. Аус ҳаулоит".
Путин Гәынба идиныҳәалеит Аԥсны ахада иалхрақәа рҿы иигаз аиааира.
Бадра Гәынба иакәзар, иазгәеиҭеит Урыстәыла ианакәызаалакгьы иҟанаҵо адгылара ишацәхьамҵуа, Аԥсны ауааԥсыра, хымԥада, уи адгылара шырныруа.
"Шәара Аԥсны ажәлари иааизакны ареспубликеи рзы иҟашәҵо адгылара иабзоураноуп иахьа Аԥсны аҿиаразы алшара ахьамоу, зегь раԥхьаӡа иргыланы Урыстәылатәи Афедерациеи ҳареи аекономикатә еизыҟазаашьақәа рышьақәгылара ахьҳалшо".
Гәынба Урыстәыла ахада иҭабуп ҳәа иеиҳәеит Ахада ифонд аҟынтәи ареспубликаҿы иҟоу Аџьынџьтәылатә еибашьра Дуӡӡа иазку амемориалтә комплексқәа реиҭашьақәыргылара аус азы иҟаиҵаз ацхырааразы, ашколхәыҷқәа мҽхакы ҭбаала рдиспансеризациа амҩаԥгареи, ареспублика аенергетикатә система адгылареи рзы.
"Иара убас, абри аҭагылазаашьа схы иархәаны, иазгәасҭарц сҭахуп, Аԥсны аҵеицәа иахьагьы иҷыдоу арратә операциаҿы иаҳзеиԥшу аиаша ишазықәԥо. Уи рхы ақәырҵахьеит жәаҩыла ҳаҷкәынцәа. Ҳара иҭахаз рыуацәа адгылар раҳҭоит. Ҳара ҳзы даара акраҵанакуеит урҭ ауаа ргәалашәара акамыршәра. Иааидкыланы ҳреспублика арҭ ашықәсқәа ирылагӡаны иҷыдоу адҵақәа назыгӡо аибашьцәа тоннашәкла агуманитартә цхыраара рзынанашьҭхьеит. Абри аганахьала иаҳҳәар ауеит ари азеиԥш Иааира шакәу, азеиԥш ԥеиԥш шаҳчаԥо", - иҳәеит Гәынба.
Афымцамч
Бадра Гәынба Владимир Путин иахь аҳәара ҟаиҵеит Аԥсныҟа иаарышьҭуа агуманитартә фымцамч амҽхак ацҵаразы. Иара иазгәеиҭеит афымцамч азымхара мшаԥымза аҽеиҩшамҭанӡа ишыҟазаауа.
Путин ари азҵаара аӡбараҿы ацхыраара шыҟаиҵо азы ажәа ииҭеит.
Иҩбоу Урыстәылатәи атәылауаҩра
Владимир Путин иҩбоу Урыстәылеи Аԥсни ртәылауаҩра рыҭара иадҳәалоу азҵаарақәа рыӡбаразы анапынҵақәа шриҭо атәы иҳәеит.
Бадра Гәынба игәалаиршәеит, ҩ-тәылауаҩрак раиуразы Аиқәшаҳаҭра атәылақәа рпарламентқәа рҿы аратификациа шырзырухьоу.
"Аԥсны Аҳәынҭқарра атәылауаа Урыстәыла атәылауаҩрагьы рыҭара алагара алзыршо амеханизм ашьақәыргылароуп иаанханы иҟоу. Шәара ижәдыруеит Шәара иҟашәҵаз адгылара абзоурала ас еиԥш аӡбамҭа шрыдыркылаз, ҳтәыла атәылауаа рахьтә 70% инареиҳаны Урыстәылатәи Афедерациа ишатәылауаау. Иҟоуп ари аҩыза алшара ахархәара иахьымӡаз ауаа, иҟалозар, ус еиԥш аҭагылазаашьа ыҟазар, ас еиԥш апрограмма иацҵазар ҳҭахын".
Амашьынарныҟәцаразы урыстәылатәи ашәҟәқәа
Путин Урыстәыла Аҩнуҵҟатәи аусқәа рминистрра анапынҵа риҭоит Урыстәылатәи Афедерациа атәылауаҩра змоу Аԥсны атәылауаа амашьынарныҟәцаратә шәҟәқәа рыҭара арццакра азҵаара аԥснытәи рколлегацәеи дареи аус еицадыруларц.
"Сара еилыскаауеит, абарҭ ашәҟәқәа раиура зҭаху рыдкыларазы аҭыԥқәа рҟны агәаранқәа ыҟазар шауа. Аха сара атәыла Аҩнуҵҟатәи аусқәа рминистрра срыҳәоит – урҭи шәареи шәеицхырааны, ас еиԥш иҟоу аҭыԥқәа рхыԥхьаӡара еиздырҳарц, насгьы уи аус адулараҟны ишәыцхраауа аусзуҩцәа рхыԥхьаӡара иацырҵарц, аԥхьаҟа шықәсыла ари аус иадымхалакәа, иаҳа ҿҳәара кьаҿла еиҿыркаарц".
Ҩ-тәылауаҩрак змоу Урыстәыла атәылауаа Урыстәыла Аҩнуҵҟатәи аусқәа рминистрра Амҩатә ныҟәара ашәарҭадаразы Аҳәынҭқарратә инспекциа ирынаҭаз арныҟәцагатә шәҟәқәа рымамкәа Урыстәыла ралалара ԥкхар ауеит.
Владимир Путин Кремль дидикылеит Аԥсны ахадас иалху Бадра Гәынба
© Sputnik / Сергей Бобылев