АҞӘА, хәажәкыра 6 - Sputnik. Урыстәыла Аԥсны афымцамч аназымхо аамҭазы лашарала еиқәнаршәалоит.
"Ҳәарада, иҷыдоу аҭагылазаашьа аан Урыстәыла аганахь игылом. Фымцамчла аԥхьаҟагьы еиқәыршәалахоит", — иҳәеит Урыстәыла ахада ипресс-маӡаныҟәгаҩ Дмитри Песков абрифинг аҿы.
Ҭагалан-аӡынтәи аамҭазы ЕгырГЕС Џьуартәи аӡеизакырҭаҿы аӡы ахьмаҷхо иахҟьаны ареспубликаҿы афымцамч азхом. Усҟан атәыла зегьы аҿы иалагалоуп аамҭеихшала алашара арцәара. Мраҭашәаратәи араионқәа лашарала реиқәыршәаразы Урыстәылантәи афымцамч аарышьҭырц аҳәара ҟарҵоит.