АҞӘА, хәажәкыра 10 - Sputnik. Аҟәа "Москва Аҩны" аҿы иаатит аҳәса Жәларбжьаратәи рымш инадҳәаланы "Иахьа адунеи аҟны аҳәса рроль" захьӡу атемала аконференциа.
Апленартә еилатәара иалахәын Аԥсны ақәҿиара дуқәа змоу 12-ҩык аҳәса – анаплакҩцәа, аҭҵаарадырреи акультуреи русзуҩцәа, ауаажәларратә усзуҩцәа. Урҭ зыӡырҩцәас ирыман Гал араион арҵаҩцәа, аҭыԥҳацәа қәыԥшцәа, иара убас Аԥснытәи аҳәынҭқарратә университет астудентцәа.
Аконференциа аҳәаақәа ирҭагӡаны уаҵәы мҩаԥгахоит, акариераз ауснагӡатә ашьақәыргылара, аҳәса реилазаарақәа рышьақәгылареи рыҿиареи ирызку амастер-классқәа.
"Москва Аҩны" аҿы Sputnik акорреспондент изеиҭарҳәеит, хәажәкыра 8 иадҳәалоу ас еиԥш иҟоу аҵаратә усмҩаԥгатә раԥхьаӡа акәны ишымҩаԥырго, уаанӡа еиҳарак аконцертқәа шракәыз имҩаԥыргоз. Аусмҩаԥгатә алахәылацәа хра злоу агәаанагарақәа рҳәеит, иҟалап иааиуа ашықәс азыгьы ари аҩыза аусмҩаԥгатә еиҿкаахар.