АҞӘА, хәажәкыра 10 - Sputnik. Очамчыра араион ақыҭақәа рҿы иҟалаз амцакрақәа зегьы дырцәеит ҳәа Sputnik иазеиҭаиҳәеит араион амцарцәара-аиқәырхаратә ҟәша аиҳабы Мурман Ԥачлиа.
Иара иажәақәа рыла, еиҳарак амца зкыз абнаҵа аҵҩаақәа ракәын.
"Ҳара иҳалшеит абаҳчақәа, ацитрустә шәырқәа, арасаҭрақәа реиқәырхара", — иҳәеит Ԥачлиа.
Хәажәкыра 10 ашьыжьаз иҟоу адыррақәа рыла, араион аҟны аҭагылазаашьа ҭышәантәалоуп.
Уаанӡа иҟаз адыррақәа, Очамчыра араион аҿы 30 гектар инареиҳаны аҵҩаақәа абылра иаҿын, амца анхарҭатә ҭыԥқәа рҟынӡа инеит, Аҽгәара ақаҭан ҩнык блит.