АҞӘА, хәажәкыра 11 - Sputnik. Аԥсны анаркотикқәа рыҭиразы амҩа "Череп" еиҿызкааз Урыстәыла атәылауаҩ дааныркылеит.
42 шықәса зхыҵуа Евгени Садовски Урыстәыла иҭышәынтәалоу, еиҿкаау агәыԥ еиҿикааит ҳәа аанацҳауеит ареспублика Аҩныҵҟатәи аусқәа рминистрра.
Жәабранмза 23 рзы Аԥсны иаанкылан ари агәыԥ иалахәыз ҩыџьа урыстәылауааи Очамчыра араион аҿы инхоз аӡәи. Урҭ ирымхын 443 грамм инареиҳаны арҩашьыгатә маҭәашьарқәа. Усҟан еилкаахеит, Краснодар зҽыҵәахны иҟаз Садовски ззин ыҟам амаҭәашьарқәа атәылахь раагара шеиҿикааз. Садовски жәларбжьаратәи ишьҭазаара рылаҳәан.
Садовски иаанкылара мҩаԥыргеит Урыстәылатәи азинхьчаратә усбарҭақәа русзуҩцәа, аԥсуа-аурыс еиқәшаҳаҭра "Ацәгьауратә усқәа рҿы азинтә цхырааразы" аҳәаақәа ирҭагӡаны.
"Ари ҳзеиԥш усураҿы еихьӡара дууп, ҳусеицураз иҩаӡара ҿыцуп. Аусеицура ҳара Аԥсны анҭыҵ иҟоу ацәгьоуратә гәыԥқәа реиҿкааҩцәа ашьаустә ҭакԥхықәра рыдҵаразы ԥхьаҟагьы иацаҳҵарц ҳгәы иҭоуп", — ҳәа иҳәеит Аԥсны Аҩнуҵҟатәи аусқәа рминистрра анаркотикқәа реикәыршара ахылаԥшразы аусбарҭа аиҳабы Асҭамыр Ԥачалиа.