АҞӘА, хәажәкыра 11 - Sputnik. Аԥсны аҳәынҭқарра ахада игрантқәа рпрограмма аԥҵахоит.
Аицлабра "Аԥсны акоманда" ахылаԥшратә хеилак аилатәараҿы аҳәынҭқарра ахада инапынҵақәа назыгӡо Бадр Гәынба иазгәеиҭеит, аицлабраҿ аиааира згои афиналистцәеи рымацара рыдагьы, егьырҭ активла зхы аазырԥшыз зегьы рызхьаԥшра шхымԥадатәиу.
"Ҳара урҭ ауаа ҳааигәара иаанҳажьроуп. Ҳацхыраара рныруазар ауп", — ҳәа азгәеиҭеит иара.
Аицлабра "Аԥсны акоманда" аплатформа "Урыстәыла - алшарақәа ртәыла" аплатформа ацхыраарала имҩаԥысуа урыстәылатәи акадртә еицлабрақәа рҿырԥшала иаԥҵоуп. Аусура хацнаркит жәабран 12 рзы.