АҞӘА, хәажәкыра 12 - Sputnik. 101-ы аԥснытәи ашколхәыҷқәа алагер "Артек" ахь амҩа иқәлеит.
Аԥсни Урыстәыла Аҵара аминистрреи ирыбжьарҵаз аиқәшаҳаҭра инақәыршәаны Аԥсны азы аквота хынтә еизырҳан.
Урыстәыла ареспублика ҳамҭас ианаҭаз ашколтә автобусқәа рыла ахәыҷқәа аҳәаа аҟынӡа инаргоит.
"Артек" аԥснытәи ашколхәыҷқәа реихьӡарақәа рзы иҟаҵоу ҳамҭоуп ҳәа азгәеиҭеит Аҵара аминистр ин.н. Инал Габлиа.
"Урыстәыла иҟоу ахәыҷтәы центрқәа зегьы рҿы иҳамоу аквотақәа хынтәны еизырҳауп. Сменацыԥхьаӡа иреиӷьу ахәыҷқәа алкааны иҳашьҭлар ҳалшоит".
Иазгәеиҭеит аҵаратә процесс ԥырхага шамам, ахәыҷқәа "Артек" ашкол аҿы рҵара ишацырҵо.
Иҳаҩсыз ашықәс иалагӡаны Аԥснынтәи "Артекҟа" ишьҭын шәҩык рҟынӡа ахәыҷқәа.