АҞӘА, хәажәкыра 14 - Sputnik. Урыстәыла Аекономикатә ҿиара аминистрра атуроператорцәа Аԥсныҟа атурқәа рыҭира аԥкразы иҟанаҵахьаз абжьгарақәа аԥнахит, абри атәы аҳәоит аусбарҭа асаит аҟны.
"Иахьатәи аамҭазы Аԥсны аҭагылазаашьа ҭышәынтәалеит ҳәа аанацҳауеит Урыстәыла Адәныҟатәи аусқәа рминистрра. Абри инамаданы, Аекономикатә ҿиара аминистрра иҟанаҵаз абжьгарақәа аԥнахуеит, насгьы Аԥсны иаҭаауа атуристтә аалыҵқәа рыҭира аиҭахацыркразы адырра ҟанаҵоит", - ҳәа аҳәоит анҵамҭаҿы.
Уаанӡа, Урыстәыла Адәныҟатәи аусқәа рминистрра урыстәылауаа ареспублика раҭаара аанкыларазы иҟанаҵаз абжьгарақәа аԥнахит, урҭ рхыԥхьаӡараҿы атуристтә хықәкқәагьы.