АҞӘА, хәажәкыра 17 - Sputnik. Ақыҭақәа Ԥсахареи Ԥсырцхеи рымҩақәа рҟны ишьҭоу иԥсабаратәым аиҟарамрақәа (лежачие полицейские-аред.) акурорттә аамҭазы иқәыргыр ҟалоит, урҭ амҩа хәҭақәа ирықәу аидара рықәхрази аиԥынчыларақәеи ҟамларцази.
Абри атәы иҳәеит Аҳәынҭқарратә автоинспекциа аиҳабы Дамеи Аҩӡба арныҟәцаҩцәа абзиабаҩцәеи иареи реиԥылараан.
"Лассы-лассы ҳара иҳадҵаалоит аидара мҩанызго амашьына дуқәа рныҟәцаҩцәа. Аиԥш зеиԥшу амашьынақәа урықәтәаны иԥсабаратәым аиҟарамрақәа рҿаԥхьа аанҿасра уадаҩуп, даара ирзыманшәалам", — иҳәеит Аҩӡба.
Убри аан иара иазгәеиҭеит ареспубликатә мҩаду Аацы ақыҭахь ахаҵәирҭа азааигәара иԥсабаратәым аиҟарамрақәа (лежачие полицейские) анышьҭырҵа ашьҭахь амҩан машәырк шыҟамлац.