АҞӘА, хәажәкыра 24 - Sputnik. Урыстәылатәи аҳақьымцәа ашколқәранӡатәи ахәыҷқәа ргәаҭарала иалагеит Аԥсны адиспансеризациа аҳәаақәа ирҭагӡаны.
Агәаҭарақәа мҩаԥысуеит ареспублика ахәыҷбаҳчақәа зегьы рҟны.
Аԥсны агәабзиарахьчара аминистр ин.н. Едуард Быҭәба иазгәеиҭеит амедицинатә гәаҭарақәа рыҩаӡара шыҳараку.
"Амедгәаҭарақәа мап рцәызкыз аҭаацәарақәагьы ыҟоуп, ари ахырхарҭалагьы аус аауеит", — иҳәеит Быҭәба.
Урыстәыла адгыларала Аԥсны ашколхәыҷқәа рдиспансеризациа мҽхакы ҭбаала амҩаԥгара иалагеит жәабран 12 рзы, ихыркәшахоит лаҵарамзазы.
Бадра Гәынбеи Урыстәыла агәабзиарахьчара аминистр Михаил Мурашкои ирыбжьарҵаз аиқәшаҳаҭрақәа рыбзоурала Аԥсны ахәыҷқәа рдиспансеризациа амҩаԥгаразы амҽхак ду змоу акциа амҩаԥгара алыршахеит.