АҞӘА, хәажәкыра 25 – Sputnik. Аԥсны Урыстәыла ахада игрантқәа Рфонд апрограммала Аџьынџьтәылатә еибашьра Ду алахәылацәеи Аԥсны афырхацәеи рбаҟақәа реиҭашьақәыргылараз аусурақәа хацыркхеит.
Убас, Маҷара ақыҭан Аџьынџьтәылатә еибашьра Ду алахәылацәа рбаҟақәа активла реиҭашьақәыргылара иаҿуп.
Аҭыԥқәа рҿы агәамсами аҵиаақәеи рҟынтәи идрыцқьоит, абаҟақәа еиҭашьақәдыргылоит, иӡыз ахәҭақәеи иԥхасҭахаз ахаҳәҟьаԥсқәеи рыԥсахуеит.
Ақыҭа ахада Денис Ҳаџьымба Аиааира агара 80 шықәса ахыҵра азгәаҭараз имҩаԥысуа аусурақәеи аҽазыҟаҵарақәеи дрыхцәажәеит. Иара иажәақәа рыла, аллеиақәа реиҭаҳара ахьазгәаҭоу аҭыԥқәа алыркаахьеит, уаҟа анаҩс Аибашьра Ду алахәылацәа рыхьӡала астела шьақәыргылахоит.
Ишәгәалаҳаршәоит жәабранмза анҵәамҭазы ари ақыҭа Урыстәыла ахада игрантқәа Рфонд аҟынтәи афинанстә цхыраара шаиоуз. Ари апрограмма инақәыршәаны, Аԥсны иахьабалак имҩаԥысуеит Аџьынџьтәылатә еибашьра Ду абаҟақәа реиҭашьақәыргылара. Арҭ аԥарақәа амемориалтә комплексқәа реиҭашьақәыргылареи аибашьраан иҭахаз ргәалашәара иазку аҭыԥқәа рырҽеиреи рзы ицхыраагӡахоит.