АҞӘА, хәажәкыра 27 - Sputnik. "Адемографиатә ҿиара" апрограммала бжь-ҭаацәарак 2025 шықәсазы ахәыҷы ииразы аԥара роуит. Абри атәы арадио Sputnik аефир аҟны еиҭалҳәеит Асоциалтә еиқәыршәареи адемографиатә политикеи рминистрра адемографиа аҟәша аиҳабы Сабина Андарбуаԥҳа.
Лара лажәақәа рыла ииасыз ашықәс азы 1036 рзаҳал рыдыркылеит уи иартәеит 112 миллион мааҭ. Убри аан ԥшь-ҭаацәарак абыжьбатәи, ма аабатәи ахәыҷы изы аԥарақәа рызшәан.
Андарбуаԥҳа иазгәалҭеит апрограмма аус шауа 2016 шықәса инаркны, 2021 шықәсазы уи Асоциалтә еиқәыршәареи адемографиатә политикеи рминистррахь ииаргеит. Уи аахыс 227 миллион мааҭ зҭаӡо 2400 рзаҳал рыдыркылахьеит.
Апрограмма хықәкыс иамоуп ареспубликаҿы иааиԥмырҟьаӡакәа инхо аԥсуа милаҭ иеиуоу аҭаацәарақәа рҿы аира аизырҳара. Актәи, аҩбатәи, ахԥатәи ахәыҷқәа рзы 100 нызқь мааҭ ршәоит, аԥшьбатәии анаҩстәи ахәыҷқәа рзы – 200 нызқь мааҭ.
2025 ашықәсазы апрограмма анагӡаразы 120 миллион мааҭ азоужьуп. Арзаҳалқәа аминистррахь инашьҭтәуп ахәыҷы даниз ашьҭахь фымз рыҩнуҵҟала.