АҞӘА, хәажәкыра 28 - Sputnik. Константин Белозиоров ицәеижь ааха аиура инамаданы ашьаус аартуп ҳәа аанацҳауеит Аԥсны Аҩнуҵҟатәи аусқәа рминистрра апресс-маҵзура.
Аусҭҵаара излаанацҳауа ала, хәажәкыра 13 асааҭ 15:30 рзы Гагра ақалақь Арӡынба имҩаду аҿы зхаҭара шьақәыргылам аӡәы "ацәымӷра зҵоу аизыҟазаашьақәа ирыхырҟьаны" Белозиоров диехсны аҭыԥ аҟынтәи дыбналеит.
Белозиоров Гагратәи араионтә хәшәтәырҭахь днаган иарма шьапгәацә акылааратә хәра аманы, иармашьаргәыцәбаҩ хәыҷы иаарту аԥҵәара аманы, иармашьаргәыцәбаҩ хәыҷы анерви армарахьтәи адаԥшьи ааха рыманы.
Аҩнуҵҟатәи аусқәа Гагратәи араионтә ҟәша аусеилыргара иалагеит хәажәкыра 15 рзы, аматериалқәа хәажәкыра 24 рзы Аҩнуҵҟатәи аусқәа рминистрра аусеилыргаратә ҟәшахьы инарышьҭит.