АҞӘА, мшаԥы 1- Sputnik. Гәдоуҭа араион аҿы ицәырҵуеит Аџьынџьтәылатә еибашьра Дуӡӡа афырхацәа зну амуралқәа.
Гәдоуҭатәи 3-тәи ашкол аҭӡамцқәа дырԥшӡоит раԥхьаӡатәи аԥсуа ԥырҩцәа – СССР Афырхацәа Мери Аҩӡԥҳаи Виктор Аргәыни рсахьақәа.
Урҭ аус рыдулоит Ростовтәи асахьаҭыхҩы Иулиа Кузменко. Лара лҭаацәа дрыцны Аԥсныҟа дааит. Гали, Очамчыреи, Тамшьи аҭӡамцқәа рҿы асахьақәа ҭылххьеит.
Кузменко Sputnik иалҭаз аинтервиу аҟны иазгәалҭеит, лара лҟазара анҵыра ду шамоу ақәеи, аԥшеи, амра аԥхареи шаԥырхагамхо.
"Аҭӡы ыҟанаҵы, асахьа ыҟазаауеит", — лҳәеит лара.
Иулиа Кузменко лусумҭа ҟалоит Џьырхәа ақыҭа ашкол аҿаԥшыларатә ган аҿы . Уаҟа иҟалоит СССР Афырхаҵа Владимир Ҳаразиа исахьа.