АҞӘА, мшаԥы 1- Sputnik. Аԥсны ахада инапынҵақәа назыгӡо Бадра Гәынбеи Урыстәыла ахада Иусбарҭа анаԥхгаҩы актәи ихаҭыԥуаҩ Сергеи Кириенкои Гәдоуҭа араион Хәаԥ ақыҭа иаҭааит ҳәа аанацҳауеит "Аԥсныпресс" амаҵзура.
Кириенко аԥсуа музыкатә рҳәагақәа ҟазҵо аҟаза Васили Арухаа иҩны даҭааит, уаҟа иара ҳамҭас аԥхьарца ирҭеит.
Уи адагьы, арратә корреспондент Семион Пегов Бадра Гәынба ҳамҭас ииҭеит Донбасс иҭархаз атанк иалху аҳәызба.
Иара убас Гәынбеи Кириенкои Аԥсны иҟоу абжьыбатәи Урыстәылатәи арратә база иаҭааит.
Дара абаза иахьаҵанакуа зыргылара иаҿу ашколи аспорттә комплекси гәарҭеит, адҵаҟаҵара ахаҭарнакцәеи дареи аргылара иадҳәалоу азҵаарақәа ирылацәажәеит. Ахшыҩзышьҭра аҭоуп аррамаҵурауаа рхәыҷқәа рымацара ракәымкәа, аҭыԥантәи ахәыҷқәагьы ари ашкол аҿы аҵара рҵарц.
Убри ала, арратә база ахьчара мацара акәымкәа, асоциалтә инфраструктура аҿиара иацхраауеит.