АҞӘА, мшаԥы 1- Sputnik. Урыстәыла Аҳәынҭқарратә Дума Аԥсныҟа баџьда заашьҭра алшо атауарқәа реиқәыԥхьаӡа арҭбааит ҳәа аанацҳауеит РИА Новости.
Адепутатцәа атауарқәа рыла ахәаахәҭра арежим азы аиҳабырабжьаратәи аиқәшаҳаҭра иацу аԥкаанҵа шьақәдырӷәӷәеит. Иара 2024 шықәса ԥхынгәымзазы Грозни ақалақь аҿы анапаҵыҩра мҩаԥысит, ареспублика аҩнуҵҟатәи аҭахрақәа рзы иаарышьҭуа атауарқәа ирызкуп.
Аиқәшаҳаҭра иазԥхьагәанаҭоит Урыстәылантәи Аԥсныҟа абензин, адизельтә былтәы, абитум, апропан еиқәшаҳаҭрала ишьақәыргылоу амҽхак аҳәаақәа ирҭагӡаны баџьда Аԥсныҟа раагара.
Аԥкаанҵа асиа дырҭбаауеит аргыларатә маҭәахәқәа, абзазаратә тауарқәа, аметалл аалыҵқәа, аԥсыӡ, ауҭраҭыхқәа, ашәырқәа рзы.